A' Ghobhar Ghlas (Scotland)

Transcript

A' GHOBHAR GHLAS : AT 123

SA1972/19.A1

Inf.* Mrs. Kate Stewart, Grimsay, N. Uist

Coll.: A.J. MacDonald

Chaidh a' Ghobhar Ghlas dh'an tràigh a dh'iarraidh maorach

's dh'fhàg i staigh na trì minneinean mine-ghlas, Tàrr na Tarra-

ghlas, An Gille Buic 's Am Meann Bàn agus thuirt i riutha gun

duine leigeil a staigh gos an tilleadh ise:

"Agus cuiridh mi," ars' ise, "snàithlein dearg agus snàithlein

uaine agus snàithlein gorm air mo chois gos gu faithnich sibh gura

mi a bhios ann."

Cha robh i fad' 'sam bith air falbh 'n uair a thàinig gnogadh

dh'an dorus ag eubhach:

"Fosglaibh seo, fosglaibh seo. Mis' ur màthair. Mis' ur

màthair."

"Cha tu. Cha tu," ars' à-san, "Bha snàithlein dearg agus

snàithlein uaine 'us snàithlein gorm ma chas ar màthair-ne."

Dh'fhalbh ... 'S e a' madadh-ruadh a bh' ann, agus dh'fhalbh

e a shitig a' bhreabadair agus fhuair e ann a' shen snàithlein

dearg, 'us uaine 'us snàithlein gorm 's chuir e ma chois iad 's

thill e. 'S thuirt e:

"Fosglaibh seo, fosglaibh seo. Mis' ur màthair. Mis' ur

màthair."

'S chuir e a staigh a spòg 's chunnaic iad na snàithleinean

's dh'fhosgail iad an dorus. Bha poc' aige 's bha e 'ga' ruith

feadh an taighe 's rug e orra 's chuir e dh'an phoc' iad. Ach

Am Meann Bàn, 's ann air cùl cloc a chaidh e 'falach. Fhuair

e e 's thug e leis uileag iad 's dh'fhalbh e dhachaidh.

'N uair a thàinig a' Ghobhar Ghlas as an tràigh cha robh

na minn roimhpe staigh idir 's dh'fhalbh i go taigh a' mhadadh-

ruadh. Chaidh i suas a mhullach an taighe 's shuidh i air an

t-simileir. Thuirt a' madadh-ruadh:

"Có tha siod shuas air mullach mo bhothain bhig chraosgaich

chràsgaich, nach leig le mo ghille beag a dhol dh'an tobar, nach

leig le mo chrogan lite goil?"

"Tha mis'" ars ise, "a' Ghobhar Ghlas air tighinn a dh'

iarraidh a cuid minn."

"Chan 'eil iad a seo agad," ars' esan.

"Tha," ars' ise, 's nuas a thàinig i a mullach an taighe 's

chaidh iad a shabaid. 'S bha iad a' sabaid 's ma dheireadh

chaidh iad ann am bogaich:

'N uair bu lugha readh iad fodha readh iad fodha chon nan

glùinean,

'S 'n uair bu mhutha readh iad fodha readh iad fodha chon

na' sùilean.

Ghabh a' Ghobhar Ghlas air a' mhadadh-ruadh 's theich e 's

chaidh i staigh 's fhuair i na trì minneinean mine-ghlas, Tàrr

na tarra-ghlas, An Gille Buic 's Am Meann Bàn 's thug i leatha

dhachaidh iad.

Archival Reference